|
「如果連自己個仔都照顧唔到，搵到錢又如何？」陳錦鴻曾言。他與杜雯惠所生的兒子陳駕樺，今年七歲，三歲時證實患有自閉症及語言障礙，「爸爸」、「媽媽」不懂叫，兩夫妻隨即讓孩子入讀協康會的訓練課程。
兒子四歲多被評估為中度智障兒童，陳錦鴻立時完成手頭工作，停工年多兩年，廿四小時觀察了解兒子的同時，亦訓練其表達、自理能力，「我連續幾個月，日日帶個仔去爬樹，每次佢一跌我就扶住佢，令佢終於對我有信心，肯聽我講。佢三歲半時，由唔識講一句完整嘅句子，到依家識得背《千字文》、《三字經》， 仲企上台朗誦，真係進步咗好多；好多人話我停工湊仔好奢侈， 但我覺得好值得！」
有個性
陳錦鴻與杜雯惠於04年結婚，07年5月，兒子陳駕樺出世，跟其他嬰孩一樣，四個月識爬、六個月識坐、九個月學走路，但偏偏不肯說話，三歲也未懂叫爸媽。以為他性格較內向而已，入讀名牌幼稚園卻因不懂排隊，被校方要求退學轉校，「個仔要食朱古力，我就要佢嗌『爸爸』先有得食，佢寧願唔食都唔肯嗌，好有個性；佢由歲幾開始鍾意玩波，鍾意留意唔同波嘅彈法同聲響，我覺得佢好犀利，可以研究一樣嘢研究足足一年！」陳錦鴻說得淡然。
轉校以後，駕樺情況未有改善，校方便提議讓他接受評估；其後，終確診為自閉症及語言障礙，兩夫妻表現冷靜。為人父的陳錦鴻，繼續工作狂搵兒子的教育經費，為人母的則買書、上網搜尋治療處理方法，「我哋覺得萬事總會有辦法解決，一定要積極去面對，逃避同埋驚都係冇用！」杜雯惠斬釘截鐵的說。
一年多後，陳錦鴻再帶兒子到政府相關部門作評估，結果是中度智障，那一刻真的為他帶來頗大衝擊，於是乎，他埋首完成手頭上的工作後便停工，專心照顧兒子，「個仔三歲半
嗰陣，連一句完整說話都講唔到，我唔介意佢將來搵唔到食，但我介意佢連簡單嘅表達能力都冇，所以我唔做嘢，首先要了解佢嘅問題喺邊度，佢嘅疑惑、障礙喺邊度。原來佢唔係唔肯學，佢係擔心你教壞佢、教衰佢，或者你令到佢有危險，佢成日諗人哋害佢、唔信人！」陳錦鴻一臉認真的說。
好爸爸
為了讓駕樺開放自己接觸這個世界，陳錦鴻每天帶他行街、游水，甚至每天爬樹個多小時，目的便是要與兒子建立互信，「呢個係一個trust game（信心遊戲）嚟嘅，佢愈爬愈高就愈易跌，而每次喺佢跌嘅時候，我總會扶實佢。經過一百次一千次之後，佢就好信我，依家我講乜嘢，佢都願意去聽，願意去接觸新事物。」在兒子面前，陳錦鴻自言不是「陳錦鴻」，而是好爸爸，「因為佢有好多問號喺個腦度，我唔想令到個仔對我嘅身分有太多嘅疑惑。譬如：我只係會成日笑嘅，盡量唔會發脾氣、或者好嬲，咁佢就會鍾意多啲，我嘅目的就係要令到佢接觸嘅嘢都係好簡單。」經過年多兩年的相處，陳錦鴻的兒子由一個原本一句完整說話也講不到的孩子，進步到能背誦《三字經》、《千字文》、九因歌。
去年9月，駕樺升讀主流小學一年級，更考獲全班第一、全級第二的佳績，看在父母眼?，着實驚喜萬分。杜雯惠說：「好多人都覺得我個仔唔識社交，死喇！但佢又好好彩，去到任何學校，都有小朋友主動去同佢玩、愛護佢；本來我都放棄咗佢嘅學業，諗住只要佢開開心心就得，考第尾咪考第尾囉，點知佢讀書好叻，所以我覺得每一個家長都唔好放棄自己嘅子女，佢哋總有優勝嘅地方，只係佢哋嘅進步係好漫長，要畀多啲耐性！」
本文摘自2014年6月4日《東周刊》
|
|
|
|
