|
去年，韓國最大型舞蹈比賽的舞台上出現了一名四歲的小女孩繆昀希（Charlotte），她與四位專業排舞師跳着韓星BoA的〈only one〉，擘着喉嚨扭動身體，最終代表香港奪得冠軍殊榮，成為新一代K-pop小天后。「從來冇諗過自己個女會代表香港參加比賽，嗰刻手都震埋，好感動！」觀眾席上、拿着攝錄機拍攝女兒舞姿的繆太熱淚盈眶的說。沒有刻意經營，只是讓女兒隨心所欲，康莊大道卻就此形成，「唔只個女有心學，做家長嘅都要有心，唔係淨係叫工人姐姐帶個女去學跳舞咁簡單；有啲人生道理，我都會親自同佢講，佢做得唔啱，我會好惡咁鬧佢，要令佢知錯！」繆太分享培育出K-pop小天后的嚴謹之道。
跳舞胎教
今年五歲的Charlotte，兩歲多便開始學跳舞，半年後轉到ＤＪ兼歌手葉文輝開設的「啤啤熊藝術中心」學習跳K-pop Dance，天生具備節拍感及音樂感的她，轉瞬便成了班中的優異生，並獲欽點與導師Bo Sir及其餘三位專業排舞師，參加韓國最大型的舞蹈比賽——「韓流舞蹈模仿大賽」，「純粹個女鍾意跳舞，咪畀佢試吓，根本冇諗過佢可以跳到BoA嘅〈only one〉舞步， 我都跟唔上呀！」繆太笑說。
懂得跳拉丁舞、國際標準舞、Hip Hop的繆太，自言懷着Charlotte時也有跳舞當運動。在胎教影響下，Charlotte兩歲多便熱愛追看跳舞卡通，每次聽到媽媽在房中播放MTV，她一定蹦蹦跳的走到她房間，雙眼凝視着電腦熒光幕，四肢不期然的舞動起來，「佢每次見到人哋跳到好靚嘅舞步，佢都會記入腦，然後返屋企練習，就算係好難好辛苦嘅舞，佢都從來冇話過要放棄，仲話第時要好似BoSir咁教人跳舞添。」繆太欣悅的說。
重點培訓
繆太認為，為免孩子參與課外活動三分鐘熱度，必先發掘其興趣所在，然後重點培訓，「其實小朋友同家長都要有個心，譬如個女鍾意跳舞，家長都要投入，必要時陪佢一齊跳，或者大家研究吓點樣跳，佢會知道、會感受到媽咪都鍾意，跟住佢就會繼續畀心機去學，唔好諗住叫工人姐姐帶個女去學跳舞就得，姐姐要嚟煮飯㗎咋。」因此，無論Charlotte學跳舞抑或比賽，繆太總會長伴左右，默默地支持，「嗰次去韓國比賽，個女一比賽完就拉住Bo Sir個同事出嚟搵我，攬住我話：『媽咪，我冇驚呀！』好感動㗎！好在佢攞完冠軍冇心雄，最緊要佢開心囉，只要佢鍾意，我都會盡量滿足佢。」
跟女兒一個餅印的繆太，現為全職家庭主婦，丈夫從事金融業，經常要到北京工作，照顧女兒的任務幾乎就落在她一人手中，培育女兒優秀的品格更是她的責任，「有時佢發忟憎，我真係會鬧佢，我鬧人好惡，鬧到佢喊，然後佢就會話：『媽咪，我唔敢喇！』我一定要佢知道自己錯喺邊，我要用呢種形式等佢唔好咁放肆。我成日都同佢講：『你跳舞叻唔代表叻一世，一定要謙虛啲。』」
獨立自主
繆太舉例說：「Charlotte兩歲嗰年，有次突然對住塊鏡猛吐口水，我估可能佢返咗playgroup，見到有小朋友咁做，佢覺得得意，有樣學樣。我即刻鬧佢，話以後唔畀佢跳舞，掟晒佢啲音樂碟，仲要解釋畀佢聽佢咁做點解唔啱，佢嗰次喊得好犀利，以後都唔敢再吐口水喇！」
繆太說，教育子女不只要求孩子要聽話， 還要自律、獨立， 正如Charlotte的時間表不是由繆太來定，是讓女兒自己去安排時間和工作，一旦她忘記了，作為母親的才會提點她、鼓勵她，「如果樣樣嘢，家長都安排好晒，其實小朋友係唔會開心，嘗試畀小朋友話吓事，佢先至會有存在感。」每個成功子女的背後，總少不了一個精明的媽媽！
去年獲得「韓流舞蹈模仿大賽」冠軍的Charlotte，今年由參賽者身分搖身一變成表演嘉賓，於早前在鑽石山荷里活廣場舉行的香港區選拔賽中，一展舞技。
本文摘自2014年9月24日《東周刊》
|
|
|
|
